FII માટે EMsમાં ફરી એકવાર રાજકીય જોખમ વધ્યું

મુંબઈ: વિદેશી રોકાણકારો માટે ઊભરતાં બજારોમાં ભારતના બજારનું આકર્ષણ ચાલુ રહ્યું છે. વિદેશી સંસ્થાકીય રોકાણકારો અથવા એફઆઇઆઇએ ભારતના ઇક્વિટી માર્કેટમાં માર્ચ દરમિયાન 2.06 અબજ ડોલરનું રોકાણ કર્યું હતું, જે તમામ ઊભરતાં બજારો કરતાં વધુ વધુ વિદેશી નાણાપ્રવાહ છે. જોકે આ વખતે એફઆઇઆઇનો આશરે 40 ટકા નાણાપ્રવાહ પ્રાઇમરી માર્કેટમાં આવ્યો છે. એફઆઇઆઇએ ખાસ કરીને બંધન બેન્ક અને ICICI સિક્યોરિટીઝના બે મોટા આઇપીઓમાં રોકાણ કર્યું હતું.

બ્લૂમબર્ગના ડેટા મુજબ ભારત પછી બીજા ક્રમે સૌથી વધુ નાણાપ્રવાહ સાઉથ કોરિયામાં રહ્યો હતો. સાઉથ કોરિયોમાં વિદેશી ફંડ્સે માર્ચ દરમિયાન આશરે ૨૫૯ મિલિયન ડોલરનું રોકાણ કર્યું હતું. બ્રિક દેશોમાં બ્રાઝિલમાં માર્ચ દરમિયાન 1.7 અબજ ડોલરનો આઉટફ્લો જોવા મળ્યો હતો. રશિયાના બજારમાંથી પણ વિદેશી ફંડ્સે આ સમયગાળામાં 500 મિલિયન ડોલર પાછા ખેંચી લીધા હતા. ચીન માટેના ડેટા ઉપલબ્ધ નથી.

જે પી મોર્ગનના એમડી અને રિસર્ચ વડા ભરત ઐયરે જણાવ્યું હતું કે, ભારતના બજારમાં ચાલુ નાણાકીય વર્ષમાં જોવા મળ્યું હતું તેવું વળતર કદાચ મળશે નહીં, પરંતુ અમને 2018-19ના નાણાકીય વર્ષમાં આશરે 10થી 12 ટકા વળતરની ધારણા છે. એફઆઇઆઇનો સારો એવો નાણાપ્રવાહ આ મહિને સારી ક્વોલિટીના પ્રાઇમરી ઇશ્યૂમાં આવ્યો છે.
ઊભરતાં બજારોમાં શેરબજારોના દેખાવના સંદર્ભમાં જોઈએ તો માર્ચમાં ભારતના બજારમાં શ્રેષ્ઠ વળતર મળ્યું નથી. માર્ચ દરમિયાન સેન્સેક્સમાં આશરે ચાર ટકા ઘટાડો થયો હતો. બ્રાઝિલ, થાઇલેન્ડ, મલેશિયા, સાઉથ કોરિયા અને તાઇવાનનાં બજારોએ ભારત કરતાં ચડિયાતો દેખાવ કર્યો હતો.

કોટક સિક્યોરિટીઝના એક્ઝિક્યુટિવ વાઇસ પ્રેસિડન્ટ સંદીપ ચોરડિયાએ જણવ્યું હતું કે, “ફેડ દ્વારા વ્યાજદરમાં વધારો ઊભરતાં બજારોમાં એફઆઇઆઇના નાણાપ્રવાહને અસર કરી શકે છે. આ પૂર્વભૂમિકામાં ભારતમાં એસઆઇપીની આગેવાની હેઠળ ઘરેલુ નાણાપ્રવાહની જરૂર છે. અમારા અભિપ્રાય મુજબ આગામી નાણાકીય વર્ષમાં ભારતનું બજાર ચાલુ વર્ષ કરતાં વધુ વોલેટાઇલ રહેવાની ધારણા છે.