IDBI બેન્ક અંગે RBIની ચિંતા વધી: FMને પત્ર લખ્યો

નવી દિલ્હી:રિઝર્વ બેન્ક ઓફ ઇન્ડિયાએ સરકારી માલિકીની આઇડીબીઆઇ બેન્કની નબળી નાણાકીય સ્થિતિ અંગે ચિંતા વ્યક્ત કરીને નાણામંત્રાલયને પત્ર લખ્યો છે. સૂત્રો મુજબ રિઝર્વ બેન્કે કહ્યું છે કે આઇડીબીઆઇની સ્થિતિ સુધારવા માટે સરકારે પગલાં લેવાં જોઈએ.

ચાલુ મહિનાની શરૂઆતમાં જ આ પત્ર લખવામાં આવ્યો હતો જેમાં એનપીએ સહિતની કેટલીક ખામીઓ પ્રત્યે ધ્યાન દોરવામાં આવ્યું હતું. અધિકારીએ કહ્યું કે, “અમારી તપાસ દરમિયાન જાણવા મળ્યું હતું કે બેડ લોનને ઓળખવાની બેન્કની પદ્ધતિ ખામીયુક્ત છે. બેન્કે જે એનપીએ દર્શાવી છે તેના કરતાં વધારે હોવાની શક્યતા છે. અમે સરકારને આ સ્થિતિ વિશે જણાવ્યું છે.

આરબીઆઇએ આ વિશે કોઈ પ્રતિભાવ આપ્યો ન હતો. આઇડીબીઆઇ હાલમાં આરબીઆઇના પ્રોમ્પ્ટ કરેક્ટિવ એક્શન (પીસીએ) ફ્રેમવર્ક હેઠળ છે. ડિસેમ્બર 2017ના અંતે કુલ નોન પરફોર્મિંગ એસેટ ₹50,622 કરોડની હોવાનું માનવામાં આવે છે જે એડ્વાન્સના 24.72 ટકા થાય છે. કંપનીએ ડિસેમ્બર 2017 ક્વાર્ટરમાં ₹1,542 કરોડની ખોટ નોંધાવી હતી. કેટલાક નિયમોનો ભંગ થવાથી બેન્ક પર આકરા નિયંત્રણ લાદવામાં આવે ત્યારે પીસીએ અમલમાં આવે છે.

નાણાકીય વર્ષ 2017ના બજેટમાં સરકારે તેનો હિસ્સો 50 ટકાથી નીચે લઈ જઈને આઇડીબીઆઇ બેન્કમાં પરિવર્તન લાવવાની યોજના જાહેર કરી હતી. આ પ્લાનમાં કોઈ પ્રગતિ થઈ નથી. વડાપ્રધાનની કચેરીએ નાણામંત્રાલયને ગયા વર્ષે પત્ર લખ્યા હતા અને પ્રસ્તાવિત મેકઓવરની વિગત માંગી હતી.

આઇડીબીઆઇને જાન્યુઆરીમાં જાહેર થયેલી ₹2.1 લાખ કરોડની પુન:મૂડીકરણની યોજનાની લાભાર્થી બનાવવામાં આવી છે. સરકારે નાણાકીય વર્ષમાં લગભગ ₹10,610 કરોડ ઉમેર્યા છે અને કોમન ઇક્વિટી ટિયર (સીઇટી) ૧નું પાલન કરવાની યોજના ધરાવે છે. આઇડીબીઆઇ બેન્કમાં મૂડીકરણ અગાઉ સરકાર 77.8 ટકા હિસ્સો ધરાવતી હતી. સરકારી માલિકીની બેન્કો પર આરબીઆઇ કેટલું નિયંત્રણ ધરાવે છે તેની ચર્ચા વચ્ચે આ પત્ર લખવામાં આવ્યો છે.

આરબીઆઇના ગવર્નર ઊર્જિત પટેલે જણાવ્યું હતું કે સરકારી માલિકીની બેન્કો પર અસરકારક નિયંત્રણ રાખવા માટે આરબીઆઇ પૂરતી કાયદાકીય સત્તા ધરાવતી નથી. તે અગાઉ એવા આરોપ મૂકવામાં આવ્યા હતા કે આરબીઆઇએ પંજાબ નેશનલ બેન્કના તાજેતરના ફ્રોડને પકડવા માટે પૂરતી કામગીરી કરી ન હતી.

આઇડીબીઆઇ બેન્કે ચાલુ સપ્તાહમાં એક કથિત ગોટાળાનો આરોપ મૂક્યો હતો જેમાં ₹772 કરોડની લોન સામેલ હતી. સીબીઆઇએ આઇડીબીઆઇ બેન્કના એક ભૂતપૂર્વ જનરલ મેનેજરની સામે કેસ દાખલ કર્યો છે.