હવે આખા દેશમાં ચાલશે માત્ર ૧ જ પાસવર્ડ!
નવી સિસ્ટમથી વાઈ-ફાઈ યુઝર્સને મળશે મોટી રાહત
(સંપૂર્ણ સમાચાર સેવા)
નવી દિલ્હી, તા.૭ મે ૨૦૨૬ — જો તમે પણ રેલ્વે સ્ટેશન, પબ્લિક લાઈબ્રેરી, પાર્ક કે મોલ જેવા સાર્વજનિક સ્થળોએ પબ્લિક વાઈ-ફાઈનો ઉપયોગ કરો છો, તો વારંવાર OTP મેળવવાની અને Login કરવાની ઝંઝટમાંથી મુક્તિ મળવાની છે. વાસ્તવમાં સરકાર યુઝર્સો માટે ખાસ હાઈ-ટેક સિસ્ટમ લાવીને આ મોટી રાહત આપવાની છે.
ભારત સરકારે યુઝર્સની સુવિધા માટે હાઈ-ટેક સિસ્ટમ લાવવાની તૈયારી શરૂ કરી દીધી છે.
આ અત્યાધુનિક સિસ્ટમ મુજબ હવે દેશમાં ચાર લાખથી વધુ વાઈ-ફાઈ હોટસ્પોટ માટે માત્ર એક જ વાર પાસવર્ડ નાખવો પડશે. એટલે કે એકવાર લોગિન કર્યા પછી, દેશમાં ગમે ત્યાં હાઈ-સ્પીડ ઈન્ટરનેટનો આનંદ માણી શકાશે. TRAIએ આ દિશામાં નવો કન્સલ્ટેશન પેપર જાહેર કર્યો છે, જેનો મુખ્ય હેતુ પીએમ-વાણી (PM-WANI) ની ખામીઓ દૂર કરી ઈન્ટરનેટ એક્સેસને વધુ સરળ બનાવવાનો છે.
નવી વ્યવસ્થા હેઠળ થનારા ફેરફારોની વાત કરીએ તો, અત્યાર સુધી ભારતમાં અંદાજે ચાર લાખ હોટસ્પોટ એક્ટિવ છે, પરંતુ દરેક નવા લોકેશન પર યુઝરે ફરીથી રજીસ્ટ્રેશન કરવું પડતું હતું. હવે નવી સિસ્ટમ આવ્યા બાદ માત્ર એક જ વાર પાસવર્ડ કે ઓટીપી નાખ્યા પછી તમે દેશના કોઈપણ પબ્લિક વાઈ-ફાઈ સાથે કનેક્ટ થઈ શકશો. ડિજિટલ પેમેન્ટને સુરક્ષિત બનાવવા માટે આમાં WPA3 જેવા લેટેસ્ટ સિક્યોરિટી સ્ટાન્ડર્ડનો ઉપયોગ કરવામાં આવશે, જેનાથી યુપીઆઈ (UPI) અને બેંકિંગ ટ્રાન્ઝેક્શન સંપૂર્ણપણે સુરક્ષિત રહેશે. આ ઉપરાંત શહેરોમાં હાઈ-સ્પીડ ઈન્ટરનેટ અને ગામડાઓ માટે કોમ્યુનિટી વાઈ-ફાઈ મોડલ લાગુ કરવામાં આવશે.
આ નવી વ્યવસ્થા ઓપરેટરો માટે કમાણીનું સાધન પણ બનશે. ટ્રાઈએ ઓપરેટરો માટે રેવન્યુ જનરેટ કરવાના ત્રણ રસ્તાઓ સૂચવ્યા છે, જેમાં ફ્રી ઈન્ટરનેટ સાથે નાની જાહેરાતો બતાવવી, હાઈ-સ્પીડ ડેટા માટે પ્રીમિયમ સબ્સ્ક્રિપ્શન લેવું અને સરકાર તરફથી મળતી નાણાકીય સહાયનો સમાવેશ થાય છે. ટ્રાઈનું માનવું છે કે જૂની સિસ્ટમમાં કમાણીનો સ્ત્રોત ન હોવાથી તે વધુ સફળ રહી ન હતી, પરંતુ નવું મોડલ આ સમસ્યા દૂર કરશે.
