બોગસ ટ્રેડિંગ લિંકથી રોકાણકારોને નિશાન બનાવ્યાનો આરોપ
સુરત સાયબર ક્રાઈમે બે આરોપીઓની ધરપકડ કરી; ૯૬ બેંક એકાઉન્ટ અને ૩૩૮ ફરિયાદો સામે આવતાં તપાસનો વ્યાપ વધ્યો
(સંપૂર્ણ સમાચાર સેવા)
સુરત,તા.૨૪ ઓક્ટોબર ૨૦૨૬ — શેરબજારમાં રોકાણ અને ટ્રેડિંગ દ્વારા ઊંચું વળતર મેળવવાની લાલચ આપીને લોકો સાથે છેતરપિંડી કરતા મોટા સાયબર ફ્રોડ નેટવર્કનો સુરત સાયબર ક્રાઈમે પર્દાફાશ કર્યો છે. પોલીસના જણાવ્યા અનુસાર, આ કથિત રેકેટમાં આશરે ૪૧૦ કરોડની ઠગાઈનો મામલો સામે આવ્યો છે. આ કેસમાં બે આરોપીઓની ધરપકડ કરવામાં આવી છે.
પ્રાથમિક તપાસમાં આ નેટવર્ક દેશનાં આશરે ૨૦ રાજ્યો સુધી ફેલાયેલું હોવાની માહિતી મળી છે. આ મામલે અત્યાર સુધીમાં ૩૩૮ જેટલી ફરિયાદો નોંધાઈ હોવાનો પણ અહેવાલ છે.
તપાસ અનુસાર, આરોપીઓ કથિત રીતે ‘જીમ્ૈં ેંન્નછ’ સહિતની બોગસ લિંક્સનો ઉપયોગ કરીને લોકોને ટ્રેડિંગમાં રોકાણ કરવા પ્રેરિત કરતા હતા. એક સુરતી વેપારીને પણ આવી લિંક્સ મારફતે રોકાણ કરાવવામાં આવ્યું હતું. વેપારીએ ૨૪ લાખથી વધુની રકમનું રોકાણ કર્યા બાદ નાણાં ઉપાડવામાં મુશ્કેલી પડતાં સમગ્ર મામલો સામે આવ્યો હતો.
આ પ્રકારની છેતરપિંડીમાં શરૂઆતમાં રોકાણ પર નફો થતો હોવાનો ખોટો ભાસ ઊભો કરવામાં આવે છે. ત્યારબાદ વધુ નાણાં જમા કરાવવાનું દબાણ કરવામાં આવે છે અથવા રોકાણકારને પોતાની રકમ ઉપાડવા દેવામાં આવતી નથી.
પોલીસ તપાસમાં આ રેકેટના કથિત માસ્ટરમાઇન્ડ અંગે પણ ચોંકાવનારી વિગતો સામે આવી છે. અહેવાલ મુજબ, લિથુઆનીયાની એક યુનિવર્સિટીમાં સિવિલ એન્જિનિયરિંગનો અભ્યાસ કરતો વિદ્યાર્થી આ નેટવર્ક ચલાવતો હોવાની આશંકા છે. તે દુબઈ સ્થિત ચાઇનીઝ ગેંગના સંપર્કમાં રહીને કામગીરી કરતો હોવાનો પોલીસને શંકા છે.
આરોપીઓના મોબાઈલ ફોનમાંથી વિદેશી ગેંગ સાથેની કથિત ચેટ મળી આવી હોવાની માહિતી પણ સામે આવી છે. જોકે, સમગ્ર નેટવર્કમાં કોની શું ભૂમિકા હતી અને આંતરરાષ્ટ્રીય કનેક્શનની હદ કેટલી છે તે તપાસ પૂર્ણ થયા બાદ વધુ સ્પષ્ટ થશે.
તપાસ દરમિયાન ૯૬ બેંક એકાઉન્ટ સાથે જોડાયેલી વિગતો મળી આવી હોવાનું અહેવાલમાં જણાવાયું છે. પોલીસને શંકા છે કે આ ખાતાઓનો ઉપયોગ ઠગાઈથી મેળવેલા નાણાંના વ્યવહારો માટે કરવામાં આવતો હતો.
કાર્યવાહી દરમિયાન મોબાઈલ ફોન, ડેબિટ કાર્ડ અને યુનિવર્સિટીના ઓળખપત્ર સહિતનો સામાન જપ્ત કરવામાં આવ્યો છે. પોલીસ હવે બેંક વ્યવહારો, ડિજિટલ પુરાવા અને આરોપીઓ વચ્ચેના સંપર્કોની તપાસ કરી રહી છે, જેથી નાણાં ક્યાંથી આવ્યા અને ક્યાં મોકલવામાં આવ્યા તેનો પત્તો મેળવી શકાય.
આ ઘટનાએ શેરબજારમાં રોકાણના નામે ચાલતી ઓનલાઈન છેતરપિંડી સામે ફરી ચેતવણી આપી છે. રોકાણકારોએ અજાણી લિંક્સ, સોશિયલ મીડિયા પર મળતી ટ્રેડિંગ ટિપ્સ અને અસામાન્ય ઊંચા વળતરની ખાતરી આપતી યોજનાઓથી સાવચેત રહેવું જોઈએ.
કોઈપણ ટ્રેડિંગ પ્લેટફોર્મનો ઉપયોગ કરતાં પહેલાં તેની વિશ્વસનીયતા અને નિયમનકારી સ્થિતિ તપાસવી જરૂરી છે. બેંકની વિગતો,ર્ ં્ઁ, પાસવર્ડ અથવા અન્ય ગુપ્ત માહિતી અજાણી વ્યક્તિ સાથે શેર કરવી નહીં.
સુરત સાયબર ક્રાઈમની તપાસ આગળ વધતાં આ કથિત રેકેટમાં સંડોવાયેલા અન્ય લોકો, નાણાંના પ્રવાહ અને દેશ-વિદેશમાં ફેલાયેલા નેટવર્ક અંગે વધુ વિગતો સામે આવવાની શક્યતા છે.
