ગરબડની ફરિયાદો બાદ ચૂંટણી પંચનો નિર્ણય
પશ્ચિમ બંગાળ વિધાનસભા ચૂંટણી માટે દક્ષિણ ૨૪ પરગણાના ૧૫ મતદાન મથકો પર શનિવારે ફરી મતદાન
(સંપૂર્ણ સમાચાર સેવા)
કોલકાતા, તા.૧ મે ૨૦૨૬ — પશ્ચિમ બંગાળ વિધાનસભા ચૂંટણી માટે દક્ષિણ ૨૪ પરગણાના ૧૫ મતદાન મથકો પર શનિવારે (૨ મે, ૨૦૨૬) ફરીથી મતદાન યોજાશે. મગરહાટ પશ્ચિમના ૧૧ મતદાન મથકો અને ડાયમંડ હાર્બરમાં ચાર મતદાન મથકો પર સવારે ૭ વાગ્યાથી સાંજે ૬ વાગ્યા સુધી મતદાન યોજાશે.
આ મતવિસ્તારો માટે મતદાન બીજા તબક્કામાં ૨૯ એપ્રિલે થયું હતું, પરંતુ ચૂંટણી પંચે તેને રદ કરીને ફરીથી મતદાનની જાહેરાત કરી છે. ચૂંટણી પંચે જણાવ્યું હતું કે ૨૯ એપ્રિલે આ મતદાન મથકો પર મતદાન દરમિયાન ગેરરીતિઓની ફરિયાદો મળ્યા બાદ આ નિર્ણય લેવામાં આવ્યો હતો. મગરહાટ પશ્ચિમ વિધાનસભા મતવિસ્તાર અને ડાયમંડ હાર્બર વિધાનસભા મતવિસ્તારના રિટર્નિંગ અધિકારીઓ અને નિરીક્ષકો તરફથી મળેલા અહેવાલોના આધારે ફરીથી મતદાન કરવાનો નિર્ણય લેવામાં આવ્યો હતો.
ચૂંટણી પંચે જનપ્રતિનિધિત્વ અધિનિયમ, ૧૯૫૧ હેઠળ મતદાન રદ કર્યું. ચૂંટણી પંચના જણાવ્યા અનુસાર, દક્ષિણ ૨૪ પરગણા જિલ્લાના ૭૭ મતદાન મથકો પર ફરીથી મતદાન માટે વિનંતી કરવામાં આવી છે. જોકે, ચૂંટણી પંચે ફક્ત ૧૫ મતદાન મથકો પર ફરીથી મતદાનની જાહેરાત કરી છે બાકીના ૬૨ મતદાન મથકો પર ફરીથી મતદાન અંગે કોઈ માહિતી જાહેર કરવામાં આવી નથી.
૨૯ એપ્રિલે મતદાન દરમિયાન દક્ષિણ ૨૪ પરગણાના બસંતી વિસ્તારમાં પણ હિંસાના બનાવો નોંધાયા હતા. ભારતીય જનતા પાર્ટીના ઉમેદવાર વિકાસ સરદાર પર અહીં હુમલો કરવામાં આવ્યો હતો. અહેવાલો અનુસાર, બસંતીમાં ભાજપના ઉમેદવારના વાહન પર તોડફોડ કરવામાં આવી હતી, જેના કારણે તણાવપૂર્ણ પરિસ્થિતિ સર્જાઈ હતી. આ ઘટના બૂથ નંબર ૭૬ પર બની હતી, જ્યાં ભાજપના ઉમેદવાર વિકાસ સરદાર પર બૂથની મુલાકાત લેતી વખતે હુમલો કરવામાં આવ્યો હતો. સૂત્રોના જણાવ્યા અનુસાર, જ્યારે ઉમેદવાર મતદાન મથકનું નિરીક્ષણ કરવા ગયા હતા, ત્યારે કેટલાક લોકોએ તેમના પર હુમલો કર્યો હતો. આ ઘટના દરમિયાન તેમના વાહન પર પણ તોડફોડ કરવામાં આવી હતી. તેમના સુરક્ષા કર્મચારીઓ પાસેથી હથિયારો છીનવી લેવાનો પણ પ્રયાસ કરવામાં આવ્યો હતો. એવો આરોપ છે કે કેન્દ્રીય દળોની હાજરી હોવા છતાં, સુરક્ષા કર્મચારીઓએ પરિસ્થિતિને નિયંત્રિત કરવા અથવા બચાવ કામગીરીમાં મદદ કરવા માટે હસ્તક્ષેપ કર્યો ન હતો. આ ઘટનાથી વિસ્તારમાં તણાવ વધુ વધ્યો હતો.
