અમદાવાદ, ગુજરાત | ૩૧મી ઓક્ટોબર ૨૦૨૬ | સામાન્ય રીતે આઠ વર્ષની ઉંમરે બાળકો શાળાકીય અભ્યાસ, રમતગમત અને પોતાના શોખમાં વ્યસ્ત હોય છે, ત્યારે અમદાવાદના આઠ વર્ષીય જયબીર સિંહ ગુરુદત્તે ફિટનેસના ક્ષેત્રે અસાધારણ સિદ્ધિઓ હાંસલ કરીને વિશેષ ઓળખ ઊભી કરી છે. પોતાની અદભુત શારીરિક ક્ષમતા અને દૃઢ નિશ્ચયના બળે જયબીર આજે ચર્ચાનું કેન્દ્ર બન્યો છે. અમદાવાદ ઇન્ટરનેશનલ સ્કૂલમાં ધોરણ 3માં અભ્યાસ કરતા જયબીરે બે રાષ્ટ્રીય વિક્રમો સ્થાપિત કરીને અમદાવાદ જ નહીં, પરંતુ સમગ્ર ગુજરાતનું ગૌરવ વધાર્યું છે.
ઇન્ડિયા બુક ઑફ રેકોર્ડ્સમાં સ્થાન મેળવનાર જયબીરે એક મિનિટમાં 122 વખત માઉન્ટેન ક્લાઇમ્બર્સ કસરત કરીને પ્રથમ રાષ્ટ્રીય વિક્રમ નોંધાવ્યો છે. જ્યારે બીજા વિક્રમ તરીકે બંને પગની ઘૂંટીઓ પર 500-500 ગ્રામનું વધારાનું વજન બાંધીને તેણે માત્ર એક મિનિટમાં 137 વખત વેઇટેડ જમ્પિંગ જેક્સ કરવાની સિદ્ધિ હાંસલ કરી છે. જયબીરે આ અગાઉ પણ નોંધપાત્ર સિદ્ધિ હાંસલ કરી છે. 20 સપ્ટેમ્બર, 2026ના રોજ તેણે માત્ર એક મિનિટમાં 156 પ્લેન્ક જેક્સ કરીને વિશ્વવિક્રમ પોતાના નામે કર્યો હતો. તેની આ સિદ્ધિને ‘વર્લ્ડ રેકોર્ડ્સ ઇન્ડિયા’ દ્વારા સત્તાવાર માન્યતા આપવામાં આવી હતી.
જયબીર એ શ્રી હર્ષમીત સિંહ ગુરુદત્ત અને શ્રીમતી ખુશબૂ કૌર ગુરુદત્તનો પુત્ર છે. ફિટનેસ પ્રત્યેની તેની નિષ્ઠા, પરિવારનું પ્રોત્સાહન અને કોચના માર્ગદર્શનને કારણે તે આટલી નાની ઉંમરે આ સિદ્ધિઓ હાંસલ કરી શક્યો છે.
જયબીરની સફર એ વાતનું ઉદાહરણ છે કે કેવી રીતે સમર્પણ અને સતત પ્રયત્નો બાળકોને અસાધારણ લક્ષ્યો પ્રાપ્ત કરવામાં મદદ કરી શકે છે. તેની સિદ્ધિઓ માત્ર તેના પરિવાર અને શાળા માટે ગર્વની ક્ષણ જ નથી, પરંતુ અન્ય બાળકો માટે પણ એક પ્રેરણા છે કે તેઓ રમતગમત ક્ષેત્રે આગળ વધે, સક્રિય રહે અને પોતાના સપનાઓને અનુસરે.
== સમાપ્ત ==
