- પોષણના પરિણામોને આગળ વધારવા માટે રાજ્ય સરકારના અધિકારીઓ, નિયામક સંસ્થાઓ અને ઉદ્યોગના હિસ્સેદારો દ્વારા ખાદ્ય ફોર્ટિફિકેશન, ખોરાકની ગુણવત્તા અને વર્તણૂક પરિવર્તન સંચાર પર મંથન કરવામાં આવ્યું.
અમદાવાદ, ગુજરાત | ૧૨મી ઓગસ્ટ ૨૦૨૬ | ફૂડ સેફ્ટી એન્ડ સ્ટાન્ડર્ડ્સ ઓથોરિટી ઓફ ઇન્ડિયા (FSSAI) દ્વારા ‘ઈટ રાઈટ ઈન્ડિયા’ અભિયાન હેઠળ આજે અમદાવાદમાં રાજ્ય સ્તરીય પરામર્શ બેઠકનું સફળ સમાપન કરવામાં આવ્યું હતું. “નૌરિશિંગ માઈન્ડ્સ, શેપિંગ ફ્યુચર્સ – ગુજરાતમાં મલ્ટી-સેક્ટરલ કન્વર્જન્સ દ્વારા પોષણ સુરક્ષાને મજબૂત કરવી” શીર્ષક હેઠળ યોજાયેલા આ કાર્યક્રમમાં સૂક્ષ્મ પોષકતત્વોની ઉણપ સામે સંકલિત પગલાં વેગવાન બનાવવા અને રાજ્યની ખાદ્ય સુરક્ષાથી વ્યાપક પોષણ સુરક્ષા તરફની સફરને આગળ ધપાવવા માટે વરિષ્ઠ સરકારી અધિકારીઓ, નિયામક સંસ્થાઓ અને ઉદ્યોગના હિસ્સેદારો એકત્રિત થયા હતા.
આ પરામર્શ બેઠકમાં રાજ્યભરમાં પોષણના પરિણામો સુધારવા માટેની વ્યૂહરચનાઓ પર કેન્દ્રિત ચર્ચાઓ કરવામાં આવી હતી. પોષણ અભિયાનના મિશન ડિરેક્ટર જિજ્ઞાશા પંડ્યા, ડીપીસીએસના સંયુક્ત નિયામક દીપક સતાણી, એફએસએસઆઈ (WCD) ના સહાયક નિયામક (ટેકનિકલ) અક્ષદા બાને અને એફએસડીએના નિયુક્ત અધિકારી વિપુલ રાણાએ ખોરાકના ફોર્ટિફિકેશન માટેના રાષ્ટ્રીય નિયમનકારી માળખા, રાજ્ય સ્તરીય અમલીકરણ અને અમલ તેમજ સૂક્ષ્મ પોષકતત્વોના હસ્તક્ષેપને એકીકૃત કરવામાં જાહેર આરોગ્ય પ્રણાલીની નિર્ણાયક ભૂમિકા વિશે ચર્ચા કરી હતી.
આ સંવાદમાં આઈસીડીએસ (ICDS) અને પોષણ પહેલો દ્વારા માતા અને બાળ પોષણને મજબૂત કરવા તેમજ શાળાકીય પોષણ કાર્યક્રમોને વધારવા પર વિશેષ ભાર મૂકવામાં આવ્યો હતો.
ઉદ્ઘાટન પ્રવચનમાં FSSAI ના સહાયક નિયામક (ટેકનિકલ) અક્ષદા બાને એ મિનરલ્સ અને વિટામિન્સની ઉણપ સામે લડવા માટે પુરાવા આધારિત વ્યૂહરચનાઓ અપનાવવાની રાજ્ય સરકારની પ્રતિબદ્ધતા પર ભાર મૂક્યો હતો. તેમણે આહારની વિવિધતા અને ફોર્ટિફાઇડ મુખ્ય ખોરાકના વપરાશમાં સુધારો કરવાના હેતુથી હાથ ધરવામાં આવતી પહેલોના અમલીકરણમાં આંતર-વિભાગીય સંકલનના મહત્ત્વ પર પ્રકાશ પાડ્યો હતો.આ સત્રમાં સમગ્ર ગુજરાતમાં ફોર્ટિફાઇડ ખોરાકની ગુણવત્તા અને પહોંચ સુનિશ્ચિત કરવા માટે મજબૂત દેખરેખ અને ઉદ્યોગની ભાગીદારીની જરૂરિયાત રેખાંકિત કરવામાં આવી હતી.
વિભાગીય અનુભવ આદાન-પ્રદાન સત્રો દ્વારા મહત્ત્વપૂર્ણ વિભાગોને તેમની પહેલો રજૂ કરવા માટેનું પ્લેટફોર્મ પૂરું પાડવામાં આવ્યું હતું. ફૂડ એન્ડ ડ્રગ્સ કંટ્રોલ એડમિનિસ્ટ્રેશન (FDCA) દ્વારા અમલીકરણ અને બજાર પર દેખરેખ રાખવાના તેના પ્રયાસોની રૂપરેખા આપવામાં આવી હતી, મહિલા અને બાળ વિકાસ વિભાગ તેમજ શાળા શિક્ષણ વિભાગના પ્રતિનિધિઓએ અનુક્રમે ICDS અને PM POSHAN દ્વારા પોષણ સુરક્ષાને મજબૂત કરવામાં તેમના યોગદાનની વિગતો આપી હતી.
આ કાર્યક્રમનું મુખ્ય આકર્ષણ મલ્ટી-સેક્ટરલ કન્વર્જન્સ દ્વારા પોષણ સુરક્ષા માટે રાજ્યનો રોડમેપ તૈયાર કરવા પર કેન્દ્રિત મોડરેટેડ ઓપન હાઉસ ચર્ચા રહી હતી.
સહભાગીઓએ વર્તમાન અંતરાયોને દૂર કરવા, નવીનતાઓ શેર કરવા અને નવા કાર્યક્રમો તથા ભાગીદારી માટેની તકો ઓળખવા અંગે મંથન કર્યું હતું. આ ચર્ચાએ એ વાતને પુનઃ પુષ્ટિ આપી કે છુપી ક્ષુધા સામે લડવું એ એક સહિયારી સામાજિક જવાબદારી છે, જેના માટે અનુભવો અને જ્ઞાનના પરસ્પર આદાન-પ્રદાન દ્વારા તમામ હિસ્સેદારોના સહયોગી પ્રયાસોની જરૂર છે.
આ બેઠકનો અંત મુખ્ય ભલામણોના સારાંશ સાથે થયો હતો, જેમાં ફોર્ટિફાઇડ મુખ્ય ખાદ્ય પદાર્થોની છેવાડાના માનવી સુધી ડિલિવરી મજબૂત કરવી, વ્યૂહરચનાત્મક સંચાર દ્વારા સમુદાયમાં જાગૃતિ વધારવી અને પોષણ હસ્તક્ષેપ માટે મજબૂત દેખરેખ પ્રણાલી સ્થાપિત કરવાનો સમાવેશ થાય છે. એવું પણ સૂચન કરવામાં આવ્યું હતું કે એક સંયુક્ત સમિતિની રચના કરવામાં આવે જે જમીની સ્તરે અપનાવવામાં આવતી પદ્ધતિઓ અને જાગૃતિના પડકારોને સમજવામાં મદદ કરે અને વિભાગો વચ્ચે સહયોગી રીતે ઉકેલો લાવે.
આ કાર્યક્રમમાં FSSAI, FDCA, મહિલા અને બાળ વિકાસ વિભાગ, શાળા શિક્ષણ વિભાગ, અન્ન, નાગરિક પુરવઠા અને ગ્રાહક બાબતોના વિભાગ, ફૂડ બિઝનેસ ઓપરેટર્સ (FBOs) અને ઉદ્યોગ સંગઠનોના પ્રતિનિધિઓ સહિત 80 થી વધુ હિસ્સેદારોએ સક્રિયપણે ભાગ લીધો હતો.
FSSAI ફોર્ટિફાઇડ ખોરાકના વપરાશને પ્રોત્સાહન આપીને અને કડક ગુણવત્તાના ધોરણો સુનિશ્ચિત કરીને સૂક્ષ્મ પોષકતત્વોની ઉણપ સામે લડવા માટે પ્રતિબદ્ધ છે. તમામ હિસ્સેદારો સાથે સતત જોડાણ પર મજબૂત ધ્યાન કેન્દ્રિત કરીને, FSSAI નો ઉદ્દેશ્ય જનજાગૃતિ વધારવાનો, પોષણ પર પ્રભાવશાળી પગલાં લેવાનો અને પોષણ 2.0 અને એનિમિયા મુક્ત ભારત જેવા મુખ્ય કાર્યક્રમોની સફળતાને ટેકો આપવાનો છે.
== સમાપ્ત ==
