દેશ-દુનિયામાંથી મળ્યા અભિનંદન
ભારતના વડાપ્રધાન નરેન્દ્ર મોદી સૌથી લાંબા સમય સુધી દેશની સેવા કરનારા ચૂંટાયેલા વડાપ્રધાન બન્યા
(સંપૂર્ણ સમાચાર સેવા)
નવી દિલ્હી, તા.૧૦ જૂન ૨૦૨૬ — વડાપ્રધાન નરેન્દ્ર મોદીએ ભારતીય રાજકારણમાં વધુ એક મોટો રેકોર્ડ બનાવ્યો છે. તેઓ સૌથી લાંબા સમય સુધી દેશની સેવા કરનારા ચૂંટાયેલા વડાપ્રધાન બન્યા છે. વડાપ્રધાન મોદીએ ભારતના પ્રથમ વડાપ્રધાન પંડિત જવાહરલાલ નેહરુનો રેકોર્ડ તોડ્યો છે. નેહરુએ ૧૩ મે, ૧૯૫૨ના રોજ પહેલી વાર વડાપ્રધાન તરીકે શપથ લીધા હતા અને સતત ૪૩૯૮ દિવસ સુધી સેવા આપી હતી. નરેન્દ્ર મોદીએ હવે ૪૩૯૯ દિવસ વડાપ્રધાન તરીકે પૂર્ણ કર્યા છે, જે સૌથી લાંબા સમય સુધી સેવા આપનારા વડાપ્રધાન બન્યા છે. વડાપ્રધાન મોદીએ ૨૬ મે, ૨૦૧૪ના રોજ પહેલી વાર વડાપ્રધાન તરીકે શપથ લીધા હતા અને ત્યારથી તેમનો કાર્યકાળ અવિરત ચાલુ છે.
નરેન્દ્ર મોદીના નેતૃત્વમાં ભાજપે ૨૦૧૪, ૨૦૧૯ અને ૨૦૨૪ માં સતત ત્રણ લોકસભા ચૂંટણીઓ જીતી. આ મહત્વપૂર્ણ સિદ્ધિ માટે પીએમ મોદીને દેશ અને દુનિયામાંથી અભિનંદન મળી રહ્યા છે.
ઉત્તર પ્રદેશના મુખ્યમંત્રી યોગી આદિત્યનાથે વડાપ્રધાન નરેન્દ્ર મોદીને ભારતીય ઇતિહાસમાં સૌથી લાંબા સમય સુધી સેવા આપનારા ચૂંટાયેલા વડાપ્રધાન તરીકે સેવા આપવાનો રેકોર્ડ હાંસલ કરવા બદલ અભિનંદન પાઠવ્યા હતા. મુખ્યમંત્રી યોગી આદિત્યનાથે સોશિયલ મીડિયા પ્લેટફોર્મ ઠ પર લખ્યું હતું કે, “આ ઐતિહાસિક સિદ્ધિ પર ૧.૪૫ અબજ ભારતીયોની સેવા, સુરક્ષા અને સમૃદ્ધિ માટે સતત સમર્પણ બદલ વડાપ્રધાન નરેન્દ્ર મોદીને હાર્દિક અભિનંદન.” તેમણે કહ્યું કે ભારતીય લોકશાહીમાં આ અભૂતપૂર્વ સિદ્ધિ દેશવાસીઓના વિશ્વાસ, સ્નેહ અને આશીર્વાદની સામૂહિક અભિવ્યક્તિ છે.
યોગી આદિત્યનાથે પોતાના સંદેશમાં કહ્યું હતું કે ઇતિહાસમાં આવા પ્રસંગો ખૂબ જ ઓછા આવે છે જ્યારે કોઈ નેતા માત્ર સરકારનું નેતૃત્વ જ નહીં કરે પણ એક સમગ્ર યુગની ચેતનાનું પ્રતિક પણ બને છે. તેમણે આ સિદ્ધિને વડાપ્રધાન મોદીની દૃઢતા, બલિદાન, દ્રષ્ટિ અને દેશભક્તિને શ્રદ્ધાંજલિ ગણાવી, જેણે લાખો ભારતીયોને ’વિકસિત ભારત’ના સંકલ્પ સાથે જોડ્યા છે.
ભારતમાં યુએસ રાજદૂત સર્જિયો ગોરે વડાપ્રધાન નરેન્દ્ર મોદીને ભારતના સૌથી લાંબા સમય સુધી સેવા આપનારા વડાપ્રધાન બનવા બદલ અભિનંદન આપ્યા. યુએસ રાજદૂત સર્જિયો ગોરે સોશિયલ મીડિયા પ્લેટફોર્મ ઠ પર લખ્યું હતું કે, “ભારતના સૌથી લાંબા સમય સુધી સેવા આપનારા ચૂંટાયેલા વડા પ્રધાન બનવા બદલ વડા પ્રધાન નરેન્દ્ર મોદીને હાર્દિક અભિનંદન. આ સિદ્ધિ તેમના દાયકાઓ લાંબા સમર્પિત જાહેર જીવન અને નેતૃત્વનું એક શક્તિશાળી પ્રમાણ છે. હું તેમને ભવિષ્ય માટે શુભકામનાઓ પાઠવું છું.”
તેમના સંદેશમાં સર્જિયો ગોરે પીએમ મોદીની લાંબી રાજકીય સફર અને નેતૃત્વ ક્ષમતાઓની પ્રશંસા કરતા તેને ઐતિહાસિક સિદ્ધિ ગણાવી. તેમનો સંદેશ એવા સમયે આવ્યો છે જ્યારે વડાપ્રધાન મોદીએ સતત ૪,૩૯૯ દિવસ સેવા આપીને ભારતના પ્રથમ વડાપ્રધાન જવાહરલાલ નેહરુના સૌથી લાંબા સમય સુધી ચૂંટાયેલા વડાપ્રધાન બનવાના રેકોર્ડને પાછળ છોડી દીધો છે.
વરિષ્ઠ રિપબ્લિકન સાંસદ અને ટેક્સાસના સેનેટર જોન કોર્નિને ભારતના સૌથી લાંબા સમય સુધી ચૂંટાયેલા વડાપ્રધાન બનવા બદલ વડાપ્રધાન નરેન્દ્ર મોદીને અભિનંદન આપ્યા. જોન કોર્નિને સોશિયલ મીડિયા પ્લેટફોર્મ ઠ પર લખ્યું કે ૧.૪ અબજ ભારતીયોના વિશ્વાસ અને સતત ત્રણ લોકશાહી જનાદેશના બળ પર વડાપ્રધાન મોદીના ૪,૩૯૯ દિવસના નેતૃત્વ પ્રાપ્ત થયા છે. કોર્નિને કહ્યું કે પીએમ મોદીનો કાર્યકાળ ભારત માટે પરિવર્તનકારી રહ્યો છે. ભારતના ઉપરાષ્ટ્રપતિ સી.પી. રાધાકૃષ્ણને વડાપ્રધાન નરેન્દ્ર મોદીને દેશના સૌથી લાંબા સમય સુધી ચૂંટાયેલા વડાપ્રધાન બનવા બદલ હાર્દિક અભિનંદન પાઠવ્યા છે. તેમણે તેને ભારતીય લોકશાહી અને રાષ્ટ્રનિર્માણની યાત્રામાં એક ઐતિહાસિક સિદ્ધિ ગણાવી હતી.
ઉપરાષ્ટ્રપતિએ કહ્યું કે આ સિદ્ધિ ફક્ત લાંબા કાર્યકાળનો રેકોર્ડ નથી, પરંતુ ભારતના પરિવર્તન અને વિકાસના એક મહત્વપૂર્ણ તબક્કાનું પણ પ્રતીક છે. તેમણે કહ્યું કે વડાપ્રધાન મોદીના નેતૃત્વ હેઠળ દેશે આર્થિક વિકાસ, માળખાગત સુવિધા વિસ્તરણ, સામાજિક સશક્તિકરણ, તકનીકી પ્રગતિ અને વૈશ્વિક પ્રતિષ્ઠામાં નોંધપાત્ર સિદ્ધિઓ હાંસલ કરી છે.
રાધાકૃષ્ણને કહ્યું કે જ્યારે ઇતિહાસ માનવ ગૌરવ અને ગુલામી નાબૂદી માટે યુએસ રાષ્ટ્રપતિ અબ્રાહમ લિંકનને યાદ કરે છે, ત્યારે વડાપ્રધાન મોદીને ૨૫૦ મિલિયનથી વધુ લોકોને ગરીબીમાંથી બહાર કાઢવા અને લાખો પરિવારોમાં આશા, તક અને આદર જગાડવા માટે યાદ કરવામાં આવશે.
ઉપરાષ્ટ્રપતિએ વડાપ્રધાન મોદીના સાંસ્કૃતિક અને સભ્યતાના દ્રષ્ટિકોણની પણ પ્રશંસા કરી. તેમણે કહ્યું કે ભારતના વારસાનું સન્માન કરવા, ગુમનામ નાયકોને ઓળખવા, સાંસ્કૃતિક પરંપરાઓનું જતન કરવા અને રાષ્ટ્રને વસાહતી માનસિકતાથી મુક્ત કરવા જેવા પ્રયાસોએ દેશવાસીઓમાં નવો આત્મવિશ્વાસ જગાવ્યો છે. ઉપરાષ્ટ્રપતિએ કહ્યું કે ઇતિહાસના એક મહત્વપૂર્ણ તબક્કે વડાપ્રધાન મોદીએ તેમના દૂરંદેશી નેતૃત્વ, અથાક મહેનત અને “રાષ્ટ્ર પ્રથમ” પ્રત્યેની પ્રતિબદ્ધતા દ્વારા ભારતની ક્ષમતાઓ અને આકાંક્ષાઓમાં નવો વિશ્વાસ જગાવ્યો છે.
ઘણા વિશ્વ નેતાઓએ વડાપ્રધાન નરેન્દ્ર મોદીને સૌથી લાંબા સમય સુધી સતત ચૂંટાયેલા વડાપ્રધાન બનવા બદલ અભિનંદન પાઠવ્યા. વિવિધ દેશોના નેતાઓએ વડાપ્રધાન મોદીના પરિવર્તનશીલ શાસન, ગ્લોબલ સાઉથ માટે તેમના સમર્થન અને સમાવેશી અને આર્થિક રીતે ગતિશીલ ભારતના તેમના વિઝનની પ્રશંસા કરી.
શ્રીલંકાના રાષ્ટ્રપતિ અનુરા કુમારા દિસાનાયકે વડાપ્રધાનને એક પત્ર લખ્યો. તેમાં તેમણે શ્રીલંકાની સરકાર અને લોકો તરફથી તેમને અભિનંદન આપતા કહ્યું, “આ સિદ્ધિ ફક્ત તમારા કાર્યકાળના વર્ષોનો પુરાવો નથી, પરંતુ એ પણ પુરાવો છે કે વિશ્વના સૌથી મોટા લોકશાહીના લોકોએ વારંવાર તમારા નેતૃત્વમાં વિશ્વાસ વ્યક્ત કર્યો છે.” તેમણે એમ પણ કહ્યું કે ભારતમાં થઈ રહેલા આર્થિક અને સામાજિક પરિવર્તનો નોંધપાત્ર છે અને વડાપ્રધાન મોદીનું વિઝન શ્રીલંકા સહિત ઘણા દેશોને પ્રેરણા આપે છે.
વડાપ્રધાન મોદીએ ૪ થી ૬ એપ્રિલ, ૨૦૨૫ દરમિયાન શ્રીલંકાની મુલાકાત લીધી હતી, જે તેમની ચોથી મુલાકાત હતી. આ મુલાકાત દરમિયાન, તેમને શ્રીલંકાના સર્વોચ્ચ નાગરિક સન્માન, મિત્ર વિભૂષણ, જે વિદેશી મહેમાનને આપવામાં આવે છે, એનાયત કરવામાં આવ્યો હતો. આ મુલાકાતે ભારતની ’નેબરહૂડ ફર્સ્ટ’ નીતિને વધુ મજબૂત બનાવી, જેમાં શ્રીલંકા ભારતના સૌથી નજીકના ભાગીદારોમાંનું એક છે. ૨૦૨૨ માં શ્રીલંકાની આર્થિક મુશ્કેલીઓ દરમિયાન ભારતે પણ નોંધપાત્ર સહાય પૂરી પાડી હતી.
સંરક્ષણ મંત્રી રાજનાથ સિંહે ઇન્સ્ટાગ્રામ પર એક પોસ્ટમાં લખ્યુંઃ “ભારતના ઇતિહાસમાં સૌથી લાંબા સમય સુધી ચૂંટાયેલા વડાપ્રધાન બનવા બદલ નરેન્દ્ર મોદીને અભિનંદન; તેમણે ૪,૩૯૯ દિવસ કાર્યકાળ પૂર્ણ કર્યો છે. ’રાષ્ટ્ર પ્રથમ’ ના સિદ્ધાંતથી પ્રેરિત એક અથાક કર્મયોગી તરીકે, તેમનો કાર્યકાળ ભારત પ્રત્યેના તેમના અતૂટ સમર્પણ, તેમના દેશવાસીઓના કલ્યાણ પ્રત્યેની તેમની અતૂટ પ્રતિબદ્ધતા અને રાષ્ટ્રની સેવામાં તેમના પરિવર્તનશીલ નેતૃત્વને પ્રતિબિંબિત કરે છે. આ સિદ્ધિ ભારતના લોકો દ્વારા તેમના નેતૃત્વમાં મૂકેલા અતૂટ વિશ્વાસ અને સમાવેશી વિકાસ અને સુશાસન માટેના તેમના સતત પ્રયાસોનો પુરાવો છે. છેલ્લા બાર વર્ષોમાં ભારતે વિકાસ અને વૈશ્વિક નેતૃત્વમાં નોંધપાત્ર પ્રગતિ કરી છે.”
