નવી દિલ્હી | ૩૧ જુલાઈ ૨૦૨૬ | ભારતમાં વિકસિત રોબોટિક ટેક્નોલોજી અને ભારતીય ડૉક્ટરોની કુશળતાએ ફરી એકવાર વિશ્વને ચોંકાવી દીધું છે. SS Innovations International ના ‘મેડ ઇન ઇન્ડિયા’ SSI Mantra સર્જિકલ રોબોટિક સિસ્ટમની મદદથી કોલંબિયામાં લગભગ 22,000 કિલોમીટર દૂર બેઠેલા સર્જનોએ ઇન્દોરમાં એક દર્દી પર સફળતાપૂર્વક રોબોટિક સ્લીવ ગેસ્ટ્રેક્ટોમી સર્જરી કરીને ભારતીય ટેક્નોલોજીનો વિશ્વ સમક્ષ પરચો ફરકાવ્યો છે.
આ ઐતિહાસિક ટેલી-સર્જરી કોલંબિયાની Hospital Internacional de Colombia અને ઇન્દોર સ્થિત Mohak Bariatrics and Robotics વચ્ચે આશરે 22,000 કિલોમીટર લાંબા ફાઇબર નેટવર્ક મારફતે સફળતાપૂર્વક સંપન્ન થઈ હતી. આ સિદ્ધિ એ સાબિત કરે છે કે હવે અદ્યતન સર્જરી માટે ભૌગોલિક અંતર કોઈ અવરોધ રહ્યું નથી.
આ દૂરથી કરવામાં આવેલી સર્જરીનું સંચાલન SS Innovations International ના સ્થાપક, ચેરમેન અને CEO ડૉ. સુધીર શ્રીવાસ્તવ એ ડૉ. વિક્ટર રાઉલ કાસ્ટિલો મેન્ટિલા અને ડૉ. જોનાથન કાસેરેસ પ્રાડા સાથે મળીને કોલંબિયાથી કર્યું હતું. જ્યારે ઇન્દોરમાં દર્દી સાથે હાજર સર્જિકલ ટીમનું નેતૃત્વ જાણીતા બેરિયાટ્રિક સર્જન ડૉ. મોહિત ભંડારી એ કર્યું હતું. તેમની સાથે ડૉ. અભિષેક તિવારી પણ હાજર રહ્યા હતા અને સમગ્ર પ્રક્રિયા સફળતાપૂર્વક પૂર્ણ કરી હતી.
સમગ્ર સર્જરી લગભગ 275–285 મિલીસેકન્ડ નેટવર્ક લેટન્સી (રાઉન્ડ ટ્રિપ ટાઈમ) પર સફળતાપૂર્વક પૂર્ણ થઈ હતી, જેણે SSI Mantra પ્લેટફોર્મની ચોકસાઈ, સ્થિરતા અને વિશ્વસનીયતાને વૈશ્વિક સ્તરે સાબિત કરી છે.
હવે નિષ્ણાત સર્જરી માત્ર મહાનગરો સુધી મર્યાદિત નહીં રહે
આ સિદ્ધિને આરોગ્ય સેવાઓના વિકેન્દ્રીકરણ તરફનું એક મહત્વપૂર્ણ પગલું માનવામાં આવી રહ્યું છે. રોબોટિક ટેલી-સર્જરી દ્વારા હવે નિષ્ણાત સર્જનો દેશ-વિદેશના દૂર આવેલા હોસ્પિટલોમાં બેઠેલા દર્દીઓ પર પણ સર્જરી કરી શકશે. તેના કારણે ગ્રામ્ય વિસ્તારો અને નાના શહેરોના દર્દીઓને મહાનગરોમાં ગયા વિના વિશ્વસ્તરીય સારવાર મળી શકશે. ઉપરાંત સર્જિકલ તાલીમ, નિષ્ણાત માર્ગદર્શન અને જટિલ સર્જરીની પહોંચ પણ વધુ વ્યાપક બનશે.
સ્વદેશી ટેક્નોલોજી, ઓછી કિંમત અને વધુ પહોંચ
વિદેશી રોબોટિક સર્જરી સિસ્ટમોની સરખામણીએ SSI Mantra સંપૂર્ણપણે ભારતમાં વિકસિત અને નિર્મિત સિસ્ટમ છે. તેની ખરીદી અને સંચાલનનો ખર્ચ તુલનાત્મક રીતે ઓછો હોવાથી વધુ હોસ્પિટલો રોબોટિક સર્જરી અપનાવી શકશે. આ ટેક્નોલોજી ટિયર-2 અને ટિયર-3 શહેરોમાં અદ્યતન આરોગ્ય સેવાઓ પહોંચાડવામાં મહત્વપૂર્ણ ભૂમિકા ભજવશે અને ભારતને સર્જિકલ રોબોટિક્સ ક્ષેત્રે વૈશ્વિક નેતૃત્વ તરફ આગળ વધારશે.
આ સિદ્ધિ અંગે વાત કરતાં SS Innovations International ના સ્થાપક, ચેરમેન અને CEO ડૉ. સુધીર શ્રીવાસ્તવ એ જણાવ્યું હતું કે, “કોલંબિયા અને ભારત વચ્ચે સફળતાપૂર્વક સંપન્ન થયેલી આ ટેલી-સર્જરી એ સાબિત કરે છે કે ગુણવત્તાસભર સર્જિકલ સારવાર માટે હવે ભૌગોલિક અંતર કોઈ અવરોધ રહ્યું નથી. અમારું લક્ષ્ય હંમેશાં એવું ‘મેડ ઇન ઇન્ડિયા’ રોબોટિક પ્લેટફોર્મ વિકસાવવાનું રહ્યું છે, જે વિશ્વસ્તરીય પ્રદર્શન સાથે વિશ્વભરના હોસ્પિટલો માટે પરવડે તેવું અને સરળતાથી ઉપલબ્ધ હોય. અમારી દરેક સિદ્ધિ નિષ્ણાત આરોગ્ય સેવાઓને દર્દીઓ સુધી વધુ નજીક પહોંચાડવાના દિશામાં મહત્વપૂર્ણ પગલું છે.”
Mohak Bariatrics and Robotics, ઇન્દોર ના સ્થાપક અને ડિરેક્ટર ડૉ. મોહિત ભંડારી એ જણાવ્યું હતું કે, “આ સર્જરી દર્શાવે છે કે રોબોટિક ટેલી-સર્જરી ભવિષ્યની આરોગ્ય વ્યવસ્થામાં ક્રાંતિકારી પરિવર્તન લાવી શકે છે. હવે શ્રેષ્ઠ તબીબી સંસ્થાઓની નિષ્ણાતી ભૌગોલિક સીમાઓમાં બંધાઈ નહીં રહે. SSI Mantra ની પરવડે તેવી કિંમત અને બહુહેતુક ક્ષમતા તેને માત્ર ભારતમાં જ નહીં, પરંતુ વિકાસશીલ દેશોમાં પણ રોબોટિક સર્જરીના વિસ્તરણ માટે અસરકારક માધ્યમ બનાવે છે.”
ભારત બની રહ્યું છે વૈશ્વિક રોબોટિક સર્જરી હબ
કોલંબિયા અને ઇન્દોર વચ્ચે સફળતાપૂર્વક સંપન્ન થયેલી આ ટેલી-સર્જરી માત્ર ટેક્નોલોજીની સિદ્ધિ નથી, પરંતુ તે એ સંકેત પણ આપે છે કે ભારત પોતાની સ્વદેશી નવીનતાઓના બળ પર વૈશ્વિક આરોગ્ય સેવાઓનું ભવિષ્ય બદલવાની ક્ષમતા ધરાવે છે. અદ્યતન રોબોટિક્સ, હાઈ-સ્પીડ નેટવર્ક અને નિષ્ણાત તબીબી સેવાઓના સંયોજનથી SS Innovations International એવું વૈશ્વિક ઇકોસિસ્ટમ તૈયાર કરી રહ્યું છે, જ્યાં દેશોની સરહદો પાર પણ દર્દીઓને ઉચ્ચ ગુણવત્તાની સર્જિકલ સેવાઓ ઉપલબ્ધ થઈ શકે.
== સમાપ્ત ==
