T20 WORLD CUP પ્રાઈઝ મની
વિજેતા ટીમને આશરે રૂ.૨૭.૪૮ કરોડ મળશે, જ્યારે રનર-અપ ટીમને પણ કરોડોની ઇનામી રકમ મળશે
(સંપૂર્ણ સમાચાર સેવા)
નવી દિલ્હી, તા.૭ માર્ચ ૨૦૨૬ —ICC T20 વર્લ્ડ કપ ૨૦૨૬ હવે તેના અંતિમ તબક્કે પહોંચી ગયો છે. અમદાવાદના નરેન્દ્ર મોદી સ્ટેડિયમમાં ૮ માર્ચના રોજ ભારત અને ન્યુઝીલેન્ડ વચ્ચે ફાઈનલ મુકાબલો રમાશે. આ મેચમાં માત્ર ટ્રોફી જ નહીં, પરંતુ કરોડો રૂપિયાની ઇનામી રકમ પણ દાવ પર લાગી છે. આ વખતે ICC એ ટુર્નામેન્ટની પ્રાઈઝ મનીમાં રેકોર્ડબ્રેક વધારો કર્યો છે, જેનાથી તમામ ટીમોને મોટો આર્થિક ફાયદો થશે. ICC એ T20 વર્લ્ડ કપ ૨૦૨૬ માટે કુલ ૧૩.૫ મિલિયન ડોલર (આશરે ૧૨૦ કરોડ રૂપિયાથી વધુ) ની ઇનામી રકમ નક્કી કરી છે. આ ૨૦૨૪ ની સરખામણીએ લગભગ ૨૦ ટકા વધારે છે. ભારત અને શ્રીલંકામાં આયોજિત આ ટુર્નામેન્ટમાં બ્રોડકાસ્ટિંગ અને સ્પોન્સરશિપ દ્વારા થયેલી જંગી કમાણીને કારણે પ્રાઈઝ પૂલમાં વધારો કરવામાં આવ્યો છે.
વિજેતા અને ઉપવિજેતાને મળશે મોટું ઇનામ
વિજેતા ટીમઃ T20 વર્લ્ડ કપ ૨૦૨૬ જીતનારી ટીમને ૩ મિલિયન ડોલર એટલે કે લગભગ ૨૭.૪૮ કરોડ રૂપિયા મળશે.
ઉપવિજેતા ટીમઃ ફાઈનલ હારનારી ટીમ પણ ખાલી હાથે નહીં જાય. રનર-અપ ટીમને ૧.૬ મિલિયન ડોલર એટલે કે આશરે ૧૪.૬૫ કરોડ રૂપિયાની રકમ આપવામાં આવશે.
આનો અર્થ એ છે કે ભારત જીતે કે ન્યુઝીલેન્ડ, બંને ટીમોના ખાતામાં કરોડો રૂપિયાની ઇનામી રકમ નક્કી છે. જોકે ચેમ્પિયન બનનારી ટીમ માટે આ રકમ વધુ ખાસ હશે, કારણ કે તેની સાથે વિશ્વ વિજેતા બનવાનું ગૌરવ પણ મળશે.
સેમીફાઈનલ અને સુપર-૮ ટીમોને પણ ફાયદો
ICC એ આ વખતે માત્ર ફાઈનલિસ્ટ જ નહીં પરંતુ બાકીની ટીમો માટે પણ સારું ઇનામ નક્કી કર્યું છેઃ
સેમીફાઈનલિસ્ટઃ સેમીફાઈનલમાં હારનારી બંને ટીમોને ૭.૨૪ કરોડ રૂપિયા (૭૯૦,૦૦૦ ડોલર) મળશે.
સુપર-૮ઃ સુપર-૮ માં પહોંચનારી ટીમોને પણ આશરે ૩.૪૮ કરોડ રૂપિયા (૩૮૦,૦૦૦ ડોલર) ની ઇનામી રકમ આપવામાં આવશે.
ગ્રુપ સ્ટેજઃ જે ટીમો ગ્રુપ સ્ટેજથી આગળ વધી શકી નથી, તેમને પણ આશરે ૨.૨૯ કરોડ રૂપિયા (૨૫૦,૦૦૦ ડોલર) આપવામાં આવશે.
આ રીતે T20 વર્લ્ડ કપ ૨૦૨૬ ની પ્રાઈઝ મનીએ ક્રિકેટ ઇતિહાસમાં એક નવો રેકોર્ડ બનાવ્યો છે. આનાથી સ્પષ્ટ છે કે T20 ક્રિકેટનો વ્યાપ સતત વધી રહ્યો છે. હવે સૌની નજર અમદાવાદના ફાઈનલ મુકાબલા પર ટકેલી છે.
