હાઈકોર્ટની ખંડપીઠનો સ્ટે
સિંગલ જજનો આદેશ રાજ્ય સરકારે પડકાર્યો, આગામી ૨૬ નવેમ્બરે હવે વધુ સુનાવણી હાથ ધરાશે
(સંપૂર્ણ સમાચાર સેવા)
અમદાવાદ, તા.૩૧ ઓક્ટોબર ૨૦૨૬ — સોમનાથ મંદિરની નજીક નોનવેજના વેચાણ પર પ્રતિબંધના રાજ્ય સરકારના નિર્ણયને શુક્રવારે બપોરે ત્રણ વાગ્યે સિંગલ જજની બેંચે રદબાતલ કર્યો હતો. જ્યારે આ આદેશને તાકીદે સરકારે ચીફ જસ્ટિસની ખંડપીઠ સમક્ષ પડકાર્યો હતો. સાંજે કોર્ટના નિયત સમય પછી પોણા સાત વાગ્યે ડિવિઝન બેંચે સિંગલ જજના ચુકાદા સામે સ્ટે આપતાં રાજ્ય સરકારને હાલ મોટી રાહત મળી છે. આ રીતે શુક્રવારે આ સમગ્ર પ્રકરણમાં નાટ્યાત્મક કાયદાકીય વળાંક જોવા મળ્યો હતો. હવે, ડિવિઝન બેંચે સિંગલ જજનો ચુકાદો સ્ટે કરી દેતાં સોમનાથ ખાતે નોનવેજના વેચાણ પરનો પ્રતિબંધ આગામી મુદત સુધી યથાવત્ રહેશે. કેસની વધુ સુનાવણી ૨૬ નવેમ્બરના રોજ કરવામાં આવશે. આ કેસમાં શુક્રવારે આશરે બપોરે ત્રણ વાગ્યે જસ્ટિસ નિશા એમ. ઠાકોરે ગીર સોમનાથ જિલ્લાના પ્રભાસ પાટણ ખાતે આવેલા સોમનાથ મંદિરની આસપાસના વિસ્તારમાં માંસાહારી હોટલ અને રેસ્ટોરન્ટ ચલાવતા માલિકો દ્વારા દાખલ કરવામાં આવેલી અરજીઓને મંજૂરી આપી હતી. આ સાથે તેમણે જિલ્લા મેજિસ્ટ્રેટ દ્વારા બહાર પાડવામાં આવેલું જાહેરનામું રદ કર્યું હતું. જેમાં નિર્ધારિત યાત્રા માર્ગો પર માંસાહારી ખોરાકના વેચાણ પર પ્રતિબંધ મૂકવામાં આવ્યો હતો.જોકે, ત્યારબાદ રાજ્ય સરકાર તરફથી એડવોકેટ જનરલ કમલભાઇ ત્રિવેદી અને મુખ્ય સરકારી વકીલ જી.એચ. વિર્ક તરફથી આ ચુકાદા સામે અપીલ દાખલ કરવાની તૈયારીઓ હાથ ધરવામાં આવી હતી. જેના ભાગરૂપે સરકારે ચીફ જસ્ટિસ માનસ રંજન પાઠક અને જસ્ટિસ નિર્ઝર દેસાઈની ડિવિઝન બેન્ચ સમક્ષ તાત્કાલિક અપીલ દાખલ કરી હતી. સાંજે લગભગ પોણા છ વાગ્યા સુધીમાં ડિવિઝન બેન્ચે સિંગલ જજના ચુકાદા પર રોક (સ્ટે) લગાવી દીધી અને નિર્દેશ આપ્યો કે સોમનાથના નિર્ધારિત યાત્રા માર્ગો પર માંસાહારી ખોરાકના વેચાણ પરના પ્રતિબંધો યથાવત્ રહેશે.આ રીતે શુક્રવારે ચાર કલાકથી પણ ઓછા સમયમાં આ કેસમાં નાટ્યાત્મક કાનૂની વળાંક જોવા મળ્યો હતો. બપોરે હોટલ માલિકોને જે રાહત મળી હતી, તે સાંજે પાછી ખેંચાઈ ગઈ હતી. આ વિવાદની શરૂઆત ૧૦ ઓગસ્ટ, ૨૦૨૬ના રોજ ગીર સોમનાથના કલેક્ટર અને જિલ્લા મેજિસ્ટ્રેટ દ્વારા બહાર પાડવામાં આવેલા એક જાહેરનામાથી થઈ હતી. આ જાહેરનામામાં પવિત્ર સોમનાથ મહાદેવ મંદિરની ૫૦૦ મીટરની ત્રિજ્યામાં અને મહત્ત્વપૂર્ણ ધાર્મિક સ્થળોને જોડતા છ ચોક્કસ માર્ગો પર માંસાહારી ખોરાક તૈયાર કરવા, તેનો સંગ્રહ કરવા અને તેના વેચાણ પર પ્રતિબંધ મૂકવામાં આવ્યો હતો.આ માર્ગોમાં ભાલકા તીર્થ, ભિડિયા સર્કલ, શંખ સર્કલ, સફારી સર્કલ, ગીતા મંદિર, હમીરજી સર્કલ અને અન્ય મહત્ત્વપૂર્ણ સ્થળોને જોડતા રસ્તાઓનો સમાવેશ થાય છે, જે પવિત્ર સોમનાથ તીર્થયાત્રા પથનો ભાગ છે. આ જાહેરનામાને ગુજરાત હાઈકોર્ટમાં બિન-શાકાહારી (નોન-વેજિટેરિયન) ખોરાક પીરસતી હોટલ અને રેસ્ટોરન્ટના માલિકો દ્વારા પડકારવામાં આવ્યો હતો. તેમણે દલીલ કરી હતી કે આ પ્રતિબંધો તેમના કાયદેસરનો વ્યવસાય કરવા અને આજીવિકા મેળવવાના મૂળભૂત અધિકારનું ઉલ્લંઘન કરે છે.રાજ્ય સરકારે રજૂઆત કરી હતી કે વ્યવસાય કરવાની બંધારણીય સ્વતંત્રતાનો અર્થ એવો ન થઈ શકે કે કોઈપણ વ્યક્તિ કોઈપણ સ્થળે, તે સ્થળના ધાર્મિક, ઐતિહાસિક અને સાંસ્કૃતિક મહત્ત્વને ધ્યાનમાં લીધા વિના, કોઈપણ પ્રકારની વ્યાપારી પ્રવૃત્તિ કરી શકે.
